Во организација на Фудбалски клуб „COOL", во Кисела Вода, Скопје, од 5 до 7 септември 2026 година ќе се одржи деветтото издание на меѓународниот детски фудбалски турнир „COOL CUP". Турнирот, чиј мото е „Фудбалот нè спојува, дружењето нè прави семејство!", веќе девет години наназад собира млади фудбалски таленти под истиот кров, градејќи вистинско „Семејство Кул".

На турнирот учествуваат четири генерации – годишта 2015, 2016, 2017 и 2018, а во секоја генерација настапуваат по 16 екипи. Со вкупно 64 тима на турнирот, „COOL CUP" го потврдува статусот на еден од најмасовните детски фудбалски настани во земјава.

И покрај тоа што најголемиот дел од учесниците доаѓаат од Македонија, турнирот со право носи меѓународен предзнак. Годинава на терените во Кисела Вода ќе настапи и ФК Чукарички од Србија, додека минатата година на турнирот учествуваа ФК Партизан од Србија и НК Осијек од Хрватска. Ваквото присуство на реномирани клубови од регионот дополнително го подигнува квалитетот на натпреварувањето и им дава на младите фудбалери можност да се мерат со врсници од различни фудбалски школи и традиции.