Само уште 10 дена делат од почетокот на новото издание на Илинден Куп, турнирот кој веќе години наназад собира дел од најдобрите младински екипи од регионот и Европа. Од 11 до 13 септември, теренитe во околината на Скопје повторно ќе бидат домаќини на голем број клубови и млади фудбалери кои ќе се борат за трофеј, но и за нешто повеќе од тоа.

Голем број клубови веќе ја потврдија својата пријава, а очекувањата се дека овогодишното издание ќе ја надмине конкуренцијата од претходните години. Со шест генерации кои настапуваат – од 2014 до 2019 година на раѓање – Илинден Куп повторно се профилира како еден од најсилните турнири од овој вид на просторот на Балканот.

Турнирот е дел од АФТ Елит Тур категоријата, највисокиот можен ранг во АФТ календарот, кој го делат само уште три турнири во регионот. Тоа значи дека најдобрите екипи на Илинден Куп ќе имаат можност да освојат огромен број АФТ бодови во новата сезона, што директно влијае на нивната позиција на АФТ листата.